Ko e hā ‘oku mahu‘inga ai ‘a e fakatotolo ko ‘ení?
Ko e ngaahi lavea ki he ‘ulú, hangē ko e lavea ‘o ki‘i uesia e ‘utó, ‘oku fa‘a hoko pē ia. ‘Oku tokolahi ‘a e kakai ‘oku fa‘a vave ‘enau fakaakeaké. ‘I he ngaahi keisi ‘e ni‘ihi, ‘oku ‘i ai ‘a e kakai ‘oku nau ma‘u ha ngaahi faka‘ilonga ‘oku hokohoko ‘ene ‘así pea ‘oku lava ke tuai ange ‘a ‘enau fakaakeaké. ‘Oku mau ‘ilo‘i ‘oku lava ke faingata‘a ki he kakaí ke ma‘u ha tokoni ‘o kapau ‘oku ‘ikai ke nau sai vave.
Ke feinga ke faingofua ange ‘a e ma‘u atu ‘e he kakaí ‘a e tokoní, te mau fakahoko ha founga sivi fo‘ou ‘i he va‘a tokoni fakavavevavé. ‘Oku fakataumu‘a ‘a e founga ko ení ke ‘ilo‘i ‘a e kakai ‘oku ngalingali ke tuai ange ‘enau fakaakeaké ke fakapapau‘i ‘oku ‘ave kinautolu ki hano toe vakai‘i ‘a e tu‘unga ‘oku nau ‘i aí.
Ko e ‘amanakí ia ke tokoni ‘a e founga fo‘ou ko ení ki he kau toketaá ke nau ‘oatu ‘a e tokanga totonu ki he kakaí ‘i he taimi totonu.
Ko e hā ‘a e me‘a ‘e hokó?
‘Oku kau ki he fakatotolo ko ‘ení ha falemahaki ‘e fā (Middlemore, Nelson Marlborough, Wellington mo Queenstown). Kapau ko ha tokotaha lahi koe na‘e hoko ha lavea ki ho ‘ulú pea ke ‘a‘ahi ki he taha ‘o e ngaahi va‘a tokoni fakavavevave ko ení ‘e ala fetu‘utaki atu ha taha ‘o e kau ngāue ‘i he falemahakí ke vakai pe te ke fie kau mai ki heni.
Kapau te ke fie ‘ilo ki ai te nau fakafehokotaki koe ki ha tokotaha fakatotolo ‘a ia te ne lava ‘o tali ha fa‘ahinga fehu‘i pē te ke fie ‘omai pea ‘oatu ha fakamatala lahi ange kiate koe. Kapau te ke fili ke kau ki heni ‘e fokotu‘utu‘u ‘e he tokotaha fakatotoló ha taimi ke talanoa ai kiate koe ‘i he ‘uluaki māhiná mo e hili ha māhina ‘e ono mei ho‘o laveá ke sio pe ‘oku ke fēfē. Ko e toe vakai‘i ko ení ‘e lava ke fai ia ‘i he telefoní, fakafou ‘i he fakataha ‘o ngāue‘aki ‘a e vitioó, ‘initanetí, pe ‘i ai tonú ‘i he ngaahi keisi ‘e ni‘ihi.
Te mau toki fakahoa leva ai ‘a e founga na‘e fakaakeake ai e kakaí kimu‘a pea mo e hili ange ‘a e founga fo‘oú ke sio pe ‘oku ‘i ai ha fakalakalaka.
Kātaki ‘o fetu‘utaki kia Jason Chua ‘i he Jason.chua@aut.ac.nz pe telefoni/text ki he 021965188 kapau ‘oku ‘i ai hao ngaahi fehu‘i.
